في ذكرى رحيل الفنان الأصيل... علي بحر
مرثية “حوار وسجال مع المرحوم”
إحنا...
تمر ذكرى.. وتمر أيام
يا رمز الحب.. والأحلام
على طيفك تمر سنين
يا أروع حب غنيته
وأحلى صوت ذاقيته
علي.... إنت العشق والهمس
تركت رحلة عمر بالأمس
وانت ساطع سطوع الشمس
علي...
قلت لولدي
باغيب عنكم أبدي
تذكرني لحظات
بين الحياة ومن مات
آنه أبوك وانت ولدي
عمر العشق ما مات
إحنا....
و لا انطفى نور الهوى
في يوم لما رحلت
إلا نشوفه مشتعل
في قلوب والله ما هدأت
بديت تعزف وتغني
يا أجمل من نقل إحساس
وبصوتك تعيش أرواح
خذيت وياك قلوب الناس
بأول ليل ولآخر ليل
وتتحدى طيور الحب
إذا أحد سمع صوتك
يقول ما آسمع!!
تر صوتك يرن بالقلب
ويترك كل أثر للحب
كل كلمة وكل نغمة
إذا تنبع من حشاك تقول
هوى العشاق في صوتي
آبي كل قلب يصير وياي محطة حب
إذا غنيت
إذا قلت الهوى مرة
ويتلاقى فيها أحباب
منو يقدر يصك بابك
وانت تفتح هوى الأبواب
علي...
آبيك تحسب معاي كل بنت
إذا صوتي صار أوتار
عود الحب في صدرها
ترك ذكرى مع دمعة تصب أنهار
وإذا قلت الشباب مجنون
وباب الحب تراه مفتوح
تشوفه قلوب تشوفه عيون
وبصوتي آقول بابجي
آعيش الحب وأترك ورد
بالبس حب... باعيش بالحب
معاكم دوم آقول اشقد
أنا منكم انتو مني
وبصوتي تعيش قلوب
وتتذكر هوى لسنين
بين الروح وبين دروب
آبي منكم سموحة وبس
رحلت عنكم بلا ميعاد
بلا استئذان
وانا قلبي لكم عطشان
وإذا إنتو ما شبعتوا
تراني والله جوعان
آبي آشبع من فرحكم
وآبي آشرب من هواكم
مثل ما إنتو شربتوا الحب
من غنوة عزفت فيها
وغنيت للعشق أمرار
وياكم...
وياكم...
إحنا....
علي إنت الحشه ومليان
كنز من حب من آلام
لا تزعل وإنت في الجنة
إذا غنينا موالك
تر إحنا لك بعد عشاق
نبيك تتطمّن بحالك
علي....
آبي منكم سموحة وبس
رحلت عنكم بلا ميعاد
وفي قلبي الوله زايد
فراغ والله ولا ينعاد
ولا بارجع ولا عايد
ومن يرحل بين لتراب
ما يرجع أو تشوفه عيون
بس صوتي آسمعه حي
وسطكم وآنه مدفون
وبلا كلمة آقول فيها
أنا حزنان
أنا فرحان
ويهل دمعي من لعيون
بقلم: حمد الشهابي
