من وعينا على الدنيا واحنا نسمع المثل اللي يقول “الرجال شايل عيبه”، وكأن المجتمع يرفع صوطه على المرأة يحذرها من ارتكاب أي جرم أو جريرة عشان لا تلحق العار على سمعتها وسمعة أهلها، ومتساهل مع أخيها الرجل!

وكأن العيب ما يطلع إلا من المره، والحرام ما تسويه إلا البنت وما عليه إذا قام فيه الرجال أو اللصبي، لأنه في النهاية هو “شايل عيبه”!

مثل شعبي للأسف يعطي الرجل العذر انه يسوي اللي يبغي، ويربي الصغار من الذكور على مبدأ أنه رجال عادي يرتكب الخطأ والحرام، لأن الله غفور ورحيم، والناس بتسامحك بتنسى لأنك صبي، والويل والثبور إذا طلع نفس العيب من البنت لأن لا المجتمع بيغفر لها ولا الناس بتنسى وتسامحها، وبس عندها الله بيكون شديد العقاب!

القرآن الكريم واضح وصريح، (مَنْ عَمِلَ صَالِحًا مِّن ذَكَرٍ أَوْ أُنثَى) صدق الله العظيم. ما في آية تقول إن الجنة للرجال والجحيم للنساء، ولا في آية تقول إن الله عز وجل بيسامح الرجل لأنه ذكر، وبيعاقب المره لأنها أنثى رغم انهم اثنيناتهم سووا الجرم نفسه.

تربية الأجيال على مثل هذا المثل تدمر أخلاقهم وتشجع الذكور على ارتكاب الخطأ، هي مو دعوة لإعطاء المرأة غطاء مجتمعي يبيح لها ارتكاب العيب والحرام، هي دعوة لإزالة هذا الغطاء عن الرجل عشان لا يكون له عذر يشجعه على ارتكاب الفواحش.

ياسمينة: نحن قوم لا نرى الخطأ إلا عندما تمارسه المرأة.