استضاف يوسف التهامي وفانا إمام في نجوم اف ام من "عيش صباحك" على "نجوم إف.إم" الفنانة فيدرا للحديث عن أعمالها الفنية الأخيرة.

وأكدت الفنانة فيدرا إنها على عكس الكثيرين، تحب أدوار ضيفة الشرف في الأعمال الفنية، موضحة: "بالنسبة لي بحب أدوار ضيفة الشرف جدا لأني بقدر أعمل أدوار كتيرة من غير ما أتسجن في الدور، ولو أنا حباه بحس إني بدخل أجيب جون وأمشي مش هلعب في الملعب كله، مثلا في (تحقيق) كان المشهد اللي عملته من أحسن المشاهد اللي عملتها، والفريق كان من أفضل الناس اللي اشتغلت معاهم".

وعن تعاملها مع السوشيال ميديا قالت: "بكره التعليقات اللي بنقراها كممثلين على السوشيال ميديا، فبطلت أقرا أكتر، وبتبقى مالهاش علاقة بشغلك نفسه لكن بيخوضوا في حياتك وشكلك ولبسك وبينسوا الشخصية اللي أنت مقدمها، لكن أنا باخد ردود الأفعال على شغلي من أصحابي ودوايرهم سواء إيجابي أو سلبي، لكن لما يكون النقد بناء وفي حاجات حقيقية".

وتابعت: "لما بيجيلي عمل ما باخدش رأي حد قبل ما أقرر، رغم إني بحب أصحابي وهم عزوتي، لكن قراراتي بحب تكون بتاعتي علشان أتحمل مسئوليتها كاملة سواء نتيجتها حلوة أو وحشة، لكن باخد رأي أصحابي في حياتي الشخصية مش الشغل".

وعن أبرز نجمات الوسط الفني اللاتي تحبهن، قالت: "هدى المفتي وتارا عماد من الشباب، ومن جيلي بحب كل أبناء جيلي من منى زكي وهند صبري وغادة عادل ومنة شلبي وريهام عبد الغفور وحنان مطاوع، إحنا عندنا رائدات في حقبتنا الزمنية".​