نجمة الأكوان.. أولى الحلقات الشعرية بالفيديو في سلسلة بعنوان "أوتار" للشاعر القدير علي عبدالله خليفة من انتاج صحيفة البلاد.
 
وهذا نص القصيدة:

نجمة الأكوان

أنا ولهان ..

يا ديرة هلي ولهان

كثر شوقـي البحر طامـي

وكثر ما أحب

يتشوّق في الهوى الخلان 

عجيبه وانتي بلادي

أحس اني أنا بلادك ..

وأحس اني ابو لأكبر اولادك

وأحس اني على ترابك

نسايم بحر في ليلك

تداعب زهرة الرمان

أنا ولهان ..

عجيبه أبتعدْ واقول

خليها اتّــذكّرني

وخليها على بعد المدى عنّي

عسى الأشواق تطفيني

وعساها ما تلاقيني

ألاقي في أقاصي الروح

نسمه من هوى مْحرّق

تهب لحظه على بالي

تشيل الروح من روحي

وتعوّد بي رمل دافــي

على اسيافك تبعثرني ..

أنا ولهان

عجيبه كلما شحّت سحايبها

ولا أمطر في هواها الدّان

أشوف الخير في بنيّه تنادي لي

واشوف أكبر أمل يبرق

عزيمه ف عين لصبيان

أنا ولهان يا ديرة هلي ولهان

أعوّد لك .. ترد لي الروح

واحط قلبي على قلبك

يا ديره بوسع هالكون

أنا مليان بك ..

يا ديرة هلي مليان

وانا بحبك كل يوم أقوى

وأحس انك عزيزه

ونجمة الأكوان