كشفت الفنانة نجلاء بدر عن تفاصيل آخر أعمالها الفنية ومشاركتها مؤخراً في فيلم "ليلة العيد" وعن رأيها في العمليات التجميلية.
وتحدث نجلاء خلال لقائها مع موقع فوشيا عن إجرائها لعمليات تجميل، وقالت: "لو عملت عملية تجميل هقول، ولو فيه حاجة عايزة أعملها هعمل كده، وفي حاجات بتتغير في تركيبة الست بحكم الهرمونات بتغير فيها حاجات".
وتابعت قائلة: "وده اللي اكتشفته وفي حاجات بحاول اضبطها على قد ما اقدر، ولكن لحد دلوقتى معملتش وإن شاء الله هعمل وقريب هعمل عملية في رجلي".
كما كشفت نجلاء بدر في تصريحاتها أنها تحب العمل مع المخرج سامح عبد العزيز بعد تعاونه معه في فيلم ليلة اللعيد قائلة: "كل مرة بيكون مختلف انا بحب الشغل مع سامح عبد العزيز وأحمد عبد الله مؤلف الفيلم بحب تركيبتهم مع بعض، بحب شغلهم لأنه أقرب للواقع.
وتابعت قائلة: "وبيدخل في الحياة بتفاصيلها بطعمها وريحتها لو طلبني حتى في مشهد هروح ليه وأنا مبسوطة".
وعن تأجيل طرح موعد فيلم "ليلة العيد" لمدة سنتين قالت: "هو اتصور في السنة اللي قبل اللي فاتت واتأجل سنة واحدة فقط، والمنتج أحمد السبكي عنده وجهة نظر في موعد طرح الفيلم".
وتابعت نجلاء إذا كان دورها في الفيلم ليدافع عن حقوق المرأة فقالت: "الثورة دي عندي على صفحتي بالفيس بوك،النساء أكيد عندهم ثورة، لأننا في مجتمع ذكوري.. والستات معندهاش الحق تعبر عن حقوقها وفيه حاجات مقيدة في التعبير عنها".