+A
A-

قصيدة مهداة إلى مقام رئيس الوزراء صاحب السمو الملكي الأمير خليفة بن سلمان آل خليفة

الا ليت شعري حين اقوله وحين ابداه..

يرحب به التاريخ مع كل بيبانه..

علشان بيتاً مر سمعي ولا عداه..

صنع حكمته راعيه صح الله السانه..

اذا الشعر لم يهززك قوله ولامعناه..

ماهو شعر لو صابت قوافيه وازانه..

ترى الشعر حاله واجود الشعر من يلقاه..

مثل حالة البحار في اللول والدانه..

وانا لي شهر ماجاد فكري ولاغناه..

ولا سيلت جرد المساحات هتانه..

اخيله واجيله واكتب وارسمه وامحاه..

واعافه ولا اركض في مداره وميدانه..

ادور علي واداً عسوسه ماجو في حماه..

يغار البختري من وروده وريحانه..

عسوساً ما شافوا روض ورده وذاقوا ماه..

ولا نوخو فيه الركايب على شانه..

علي شان بيتاً يوم ابثه ويوم أقراه..

تلفت له ارقاب الرياجيل حيرانه..

سلامي على اللي هيبته في عيون اعداه..

اليا سل سيف العدل واحمرت اعيانه..

وسلامي على اللي للتواضع سما واسماه..

ورفع هيبته رب المخاليق سبحانه..

وسلامي على اللي جذ عرق الغلو وادماه..

لين ان التطرف والغلو ماتت اركانه..

وسلامي على اللي صانعٍ مجده بيمناه..

سنينه من الامجاد تفرق عن اقرانه..

وسلامي على ستر الوطن من هنا لاقصاه..

حدود الوطن تجري بقلبه وشريانه..

وسلامي على اللي كل  بيضاء طرب تزهاه..

تلوح البشاير في عيونه وحجانه..

خليفه وانا ادري كل حرفٍ من اسمه جاه..

سمو الشرف عون المجنا ومزبانه..

خليفه ولد من هامة المجد ماتنساه..

يعطر جناب الشعر ذكره وديوانه..

نهل من علوم النادر اللي ندر مجناه..

وشرب حكمته واوقد بناره وصوانه

هذا شداده اللي فيه يزهو وذا مركاه..

وهذا ورث ابوه وورث جده وعمانه..

معه شعبه اللي كل قمة فخر يرقاه..

جنوداً على البارود والملح دجرانه..

لسوق المنايا ارواحهم للوطن مهداه..

مثل مااحتموا جدانهم دون حدانه..

على السمع والطاعه ومايرتضيه الله..

حماة الوطن سم السقطري لمن خانه..

عيون الصقور الساهره والوطن وحماه..

عليهم يحف اظلال ربي ورضوانه..

وعلى كل مقرود ٍ شعب للردا وجناه..

سهومٍ بسوق الموت جوعاء وعطشانه..

والله يحفظ البحرين مدهاله ومرباه..

تحت ظل راع الطيب واسمه وعنوانه..

 

الشاعر تركي الميزاني المطيري